Njohja e Kosovës si shtet sovran dhe i pavarur nga ana e Serbisë është thënë se është qëllimi i dialogut në mes të dyja shteteve.
Por sa do të arrihet kjo, tani kur pritet të fillojë dhe faza finale e këtij dialogu?
Lidhur me këtë, njohësi i çështjeve politike në vend, Islam Krasniqi, në një prononcim për gazetën “Bota sot”, ka thënë se me këtë klasë politike asnjëherë nuk do të përmbyllet dialogu e as nuk do të ketë njohje reciproke.
“Më këtë klasë politike asnjëherë nuk do të përmbyllet dialogu Kosovë-Serbi, as nuk do të ketë njohje reciproke siç po e quajnë këta politikanët tanë, duke mos pasur as përmbyllje finale të dialogut, sepse Serbia me të gjitha forcat e vetë po punon kundër Republikës së Kosovës duke bllokuar çdo rrugë drejt integrimit, gjëra politikanët tanë bëhen servil dhe pranojnë çdo që i qitet përpara”, është shprehur ai.
Sipas Krasniqit, nuk do të ketë epilog me dialogun dhe se ai do të vazhdojë me vite, derisa serbët të arrijnë autonominë që e duan brenda Kosovës.
“S’do të ketë ndonjë epilog lidhur me dialogun, pos asaj që ky proces i bisedimeve do të vazhdojë me vite, gjersa serbët të arrijnë atë që po e kërkojnë autonominë brenda Kosovës”, ka deklaruar Krasniqi për “Bota sot”.
