Profesori i shkencave të sigurisë: Forcat e Armatosura kanë kompetenca ushtarake, u mungon vetëm emri - Bota Sot
Profesori i shkencave të sigurisë: Forcat e Armatosura kanë kompetenca ushtarake, u mungon vetëm emri

Politika

E enjte, 15 nëntor 2018

Profesori i shkencave të sigurisë: Forcat e Armatosura kanë kompetenca ushtarake, u mungon vetëm emri

Nga: G.B Më: 19 tetor 2018 Në ora: 15:00
Pjesëtarë të FSK-së

Dje deputetët e Kuvendit të Kosovës kanë votuar pro ndryshimeve të projektligjit për FSK-në. Këto ndryshimeve janë votuar nga të gjithë deputetët shqiptarë, ndërsa që Lista Serbe e ka lëshuar seancën sapo ka filluar debati për projektligjin.

Lidhur me këtë, profesori i çështjeve të sigurisë, Avni Islami, në një prononcim për gazetën “Bota sot”, ka thënë se që nga viti 2014 institucionet e Kosovës janë përpjekur që ta bëjnë transformimin e FSK-në në Forca të Armatosura por kjo gjë nuk ka qenë e mundur të bëhet me ndryshime kushtetuese dhe tani është bërë me ndryshim të projektligjit.

Image
Avni Islami

“Dihet se që nga viti 2014 institucionet e Kosovës janë përpjekur që ta bëjnë transformimin e FSK-në në Forca të Armatosura përmes ndryshimeve kushtetuese. Por që të bëhet ajo janë dashur 2/3 e minoriteteve dhe që ka qenë dhe mbetet e pamundur, pasi Lista Serbe ka qenë kundër dhe ka qenë e pamundshme. Pastaj edhe vetë bashkësia ndërkombëtare është bindur se është e pamundur që të bëhet transformimi i FSK-së në Forca të Armatosura dhe kësisoj është parë e udhës, pra me miratimin e NATO-s, me bekimin e SHBA-së, NATO-s dhe BE-së që me ndryshimet e tri projektligjeve t’i jepet mandat të plotë FSK-së që të kryejë funksionin e Forcave të Armatosura të Kosovës”, është shprehur ai,

Sipas Islamit, Forcat e Armatosura kanë kompetenca të karakterit ushtarak dhe që i mungon vetëm emri ushtri.

“Pra në rastin konkret vetëm emri i mungon. Përndryshe me miratimin e këtyre projektligjeve, FSK-ja merr kompetencat e plota dhe objektivat e saj janë të karakterit të plotë ushtarak të Forcave të Armatosura të Kosovës. Dhe kësisoj ajo i kryen detyrat e saj konform ligjit, i cili parasheh që Forca e Sigurisë së Kosovës të jetë e armatosur me të gjitha armët që janë të nevojshme për mbrojtjen e vendit, pra një ushtri defanzive me 3-5 mijë trupa aktivë dhe 3 mijë trupa rezervë”, ka vlerësuar ai.

Në lidhje me reagimin e NATO-s, Islami thotë se derisa tani Forcat e Armatosura kanë kompetenca ushtarake, NATO edhe mund të zvogëlojë numrin e ushtarëve dhe që bashkë me ushtarët e FSK-së të kryejë misionin e mbrojtjes së paqes dhe të sigurisë në Kosovë.

“Reagimi i parë dje erdhi nga NATO që thoshte se do ta rishqyrtojë pozicionin e vet në Kosovë, për shkak se tani Forca e Armatosur e Kosovës ka kompetenca dhe tani NATO mund ta zvogëlojë numrin e ushtarëve të vet dhe bashkarisht me ushtarët e FSK-së ta kryejë misionin e saj të mbrojtjes së paqes dhe sigurisë në Kosovë, kësisoj FSK-ja me marrjen e këtij mandati dhe me ndryshimet e projektligjeve, FSK tani është prodhues i paqes dhe sigurisë në Kosovë, rajon dhe me gjerë”, ka deklaruar Avni Islami për gazetën “Bota sot”.

Shfaq komentet
comments powered by Disqus
Sot mund të lexoni Shfletoni kopertinat
Sondazh
test