Presidenti i Kosovës, Hashim Thaçi, ka deklaruar se marrëveshja me Serbinë është e largët dhe pothuajse e pamundur.
Gjatë qëndrimit të tij në Amerikë, ai ka mbajtur dhe një ligjëratë publike në “Atlantic Council” në Uashington të SHBA-së, ku ka thënë se Kosova ka mësuar se nuk ka marrëveshje pa kompromise, por gjithashtu ka mësuar se nëse bashkëpunon me partnerët e vet ndërkombëtarë, veçanërisht me Shtetet e Bashkuara, kompromisi ka sjellë deri te realizimi i aspiratave të popullit të Kosovës.
Se sa pritet që të ketë marrëveshje në një të ardhme të afërt me Kosovën, apo ajo është larg dhe thuajse e pamundur, njohësi i çështjeve politike në vend, Faik Krasniqi, ka thënë për gazetën ”Bota sot” se marrëveshjet e arritura deri tani në dialogun me Serbinë kanë qenë sa për sy e faqe dhe nuk janë zbatuar dhe se na bisedimet ka përfituar vetëm Serbia.
“Bisedimet me Serbinë dhe marrëveshjet e nënshkruara, nuk kanë dhënë asnjë efekt deri më tash. Ato marrëveshje janë nënshkruar sa për sy e faqe, por asnjëra prej tyre nuk është zbatuar në praktike nga ana e Serbisë. Ky dialog i ka shkuar për shtati vetëm Serbisë, sepse në bazë të këtij dialogu u afrua sa më shumë me BE-në, duke e fituar statusin kandidat për anëtarësim. Kurse Kosova përveç që u dëmtua, vazhdon të ngelet e izoluar”, është shprehur ai.
Sipas Krasniqit, nëse marrëveshja me Serbinë është e largët, fajtor është Thaçi i cili ka vënë në dyshim shtetësinë e Kosovës, derisa shton se ka frikë për kushti i BE-së për marrëveshje do të jetë ndarja e Kosovës.
“Nëse marrëveshja me Serbinë është e largët sipas Hashim Thaçit, atëherë ai është fajtori kryesor, sepse me këtë dialog pa asnjë kusht të vetëm e dëmtoi shtetin dhe qytetarët e Kosovës. E vuri në dyshim shtetësinë e saj, kurse Serbinë e fuqizoi në masë të madhe. Kam frikë se kushti i BE-së, që është shndërruar në avokate dhe zëdhënëse e Serbisë, ndarja e pjesës veriore do jetë kusht për Kosovën në mënyrë që të njihet nga Serbia. Presidenti Thaçi duhet të burgoset për dëmet që ia ka bërë Kosovës, dhe për qëllimet e tij djallëzore për ndarje të Kosovës”, ka theksuar Krasniqi.
Ai thotë se Serbia dhe BE-ja kanë gjetur Thaçin për të arritur qëllimet e tyre djallëzore, për çka ai është i gatshëm që të copëtojë atdheun e tij.
“Serbia dhe BE-ja kanë gjetur një njeri lojal për qëllimet e tyre djallëzore, i cili është i gatshëm edhe ta copëtojë atdheun e tij, vetëm e vetëm t'i kënaq apetitet e Serbisë dhe BE, e ai njeri nuk është kush tjetër pos gjarpri i veshur me lëkurën e njeriut që quhet Hashim Thaçi”, ka deklaruar Faik Krasniqi për gazetën “Bota sot”.