Më në fund pjesëtarë të pozitës dhe një pjesë e vogël e opozitës i thanë “po”, miratimit të rezolutës e cila i jep të drejtën Shpend Ahmetit që të bëhet bashkëkryesues i dialogut me zëvendëskryeministrin Fatmir Limaj.
Me 59 vota për, 2 abstenime Kuvendi e miratoi rezolutën për ekipin negociator me Serbinë, e propozuar nga Partia Socialdemokrate (PSD).
Pjesa tjetër opozitës është deklaruar kategorikisht kundër këtij vendimi. Sipas tyre, kjo është vetëm blerje kohe për zgjatjen e jetës së qeverisë më të mbrapsht të cilën Kosova e ka pasur ndonjëherë.
E, shoqëria civile konsideron se bashkëkryesuesit Limaj e Ahmeti kanë nevojë më shumë për njohjen e tyre ndërkombëtarisht si lider, se sa që do përfaqësojnë denjësisht interesat Kosovës.
Për këtë çështje ka folur edhe deputetja e Kuvendit të Kosovës nga radhët e Lëvizjes Vetëvendosje, Drita Millaku.
Millaku në një prononcim për gazetën “Bota sot”, ka thënë se ka qenë i ditur epilogu i Partisë Socialdemokrate të Kosovës, që nga momentin kur kjo e fundit ka tradhtuar elektoratin e saj.
“Ka qenë i ditur epilogu i PSD-së që në momentin që ka tradhtuar elektoratin, por nuk e di pasi që Shpend Ahmeti do të jetë bashkëkryesues në dialog apo do të ketë mundësi të punojë si kryetar i Prishtinës apo ndoshta udhëheqjen e Prishtinës do ta ketë si “hobi”, ka thënë deputetja e Vetëvendosjes.
Në fund, ajo ka ngritur hipoteza se si do sillen ekipi negociator, kur dihet se në mesin e tyre nuk do të jetë asnjë femër.
“Paramendoni gjithë ata burra do t’i rrinë gatitur Mogherinit”, ka përfunduar deputetja Drita Millaku, për gazetën “Bota sot”.