Dështon gjykimi ndaj zyrtarëve të Komunës së Prishtinës të akuzuar për shpronësime të paligjshme - Bota Sot
Dështon gjykimi ndaj zyrtarëve të Komunës së Prishtinës të akuzuar për shpronësime të paligjshme

Prishtina

Dështon gjykimi ndaj zyrtarëve të Komunës së Prishtinës të akuzuar për shpronësime të paligjshme

Më: 7 korrik 2020 Në ora: 16:41
Gjykimi

Kryetarja e trupit gjykues, gjykatësja Violeta Namani deklaroi se për shkak të mungesës së anëtares së trupit gjykues, gjykatëses Kuka-Mekaj, nuk mund të mbahet seanca e së martës.

Ndërsa për shkak të gjendjes me pandeminë Covid-19, e njëjta njoftoi se seanca do të shtyhet në afat të pacaktuar.

Ndryshe në seancën e kaluar të mbajtur me 24 qershor 2020, kishin dhënë deklaratë dy të dëmtuarit Naim Rrustemi dhe Ilir Rama, të cilët kishin deklaruar se Komuna e Prishtinë ua kishin shpronësuar pronën në mënyrë të paligjshme, duke ia kaluar pronën e tyre në pronësi të komunës pa i përmbushur kushtet ligjore, raporton “Betimi për Drejtësi”.

Sipas aktakuzës së përpiluar më 15 nëntor 2018, tre të akuzuarit kishin vënë nënshkrimet e tyre në parashtresën e datës 28 tetor 2014, të përpiluar nga e akuzuara Byqmeti, zyrtare e lartë për pronësim e shpronësim në Drejtorinë e Financave dhe Pronës në Komunën e Prishtinës, ndërsa i akuzuari Visar Berisha, në cilësi të drejtorit të Drejtorisë së Financave dhe Pronës dhe Shemsedin Thaqi, në cilësi të shefit të sektorit të pronës në këtë drejtori kishin shprehur pajtimin e përbashkët me të akuzuarën Byqmeti që të kërkohet depozitimi i mjeteve financiare në xhirollogarinë e mirëbesimit në Bankën Qendrore të Kosovës, në emër të Komunës së Prishtinës për kompensimin e parcelës kadastrale nr. 756-5, Zona Kadastrale, Matiqan, sipas vendimit të kryetarit të Komunës të datës 27 qershor 2013.

Po ashtu, thuhet se me parashtresën e 11 nëntorit të vitit 2014, dy të bashkëpandehurit Visar Berisha dhe Shemsedin Thaqi duke vënë nënshkrimet e tyre në kërkesën e të akuzuarës Byqmeti kanë shprehur pajtimin e plotë të përbashkët me të që të bëhet edhe regjistrimi në operatin kadastral të pjesëve të parcelave kadastrale nr.754-2, nr. 756-12, 756-13, 756-5 ,756-4 dhe 756-8, zona kadastrale Matiqan, në emër të Komunës së Prishtinës, sipas vendimeve përfundimtare të datave 27 qershor 2013 dhe 22 korrik 2013, me të cilat vendime është miratuar shpronësimi i parcelave sipas listave të bashkëngjitur me këto vendime “për arritjen e qëllimit dhe përfitimit të ligjshëm publik”, që sipas planit rregullues “Mati 1” ishte paraparë realizimi i projektit të ndërtimit të rrugës “Enver Maloku Faza-2”, edhe pse parcelat e tilla sipas dokumentacionit kadastral nuk kanë qenë pronë shoqërore, por pronë private e të dëmtuarve Emine Rrustemaj, Nasim Rrustemit dhe Ilir Rrustemit, me çka tre të pandehurit nuk kanë respektuar dispozitën e nenit 26 të Ligjit për Shpronësimin e Pronës së Paluajtshme, duke prekur kështu të drejtat pronësore të të dëmtuarve, meqë vendimet e mësipërme të shpronësimit janë zbatuar para se plotësohen kushtet ligjore, sipas nenit 16 të këtij ligji.

Kjo sipas akuzës, ngase paraprakisht nuk ishte bërë pagesa e plotë e shpronësimeve si kusht për ndryshimet e mëvonshme kadastrale për bartjen e pronës, por janë deponuar 370 mijë euro nga Komuna e Prishtinës, në xhirollogarinë e mirëbesimit në emër të të dëmtuarve në BQK, më 29 tetor 2014, ku nuk është llogaritur edhe interesi prej 7%, e cila përqindje thuhet se arrin rreth 50 mijë euro.

Shfaq komentet
comments powered by Disqus
Sot mund të lexoni Shfletoni kopertinat