Keqpërdorën detyrën zyrtare, aktakuzë për pesë zyrtarë policorë në Prizren

Prizreni

Keqpërdorën detyrën zyrtare, aktakuzë për pesë zyrtarë policorë në Prizren

Më: 31 dhjetor 2021 Në ora: 11:07
Ilustrim

Prokuroria Themelore në Prizren, ka ngritur aktakuzë kundër pesë zyrtarëve policorë: S.H., V.K., F.K., A.P., dhe A.K., për shkak të dyshimit të bazuar se në bashkëkryerje kanë kryer veprat penale “Keqtrajtimi gjatë ushtrimit të detyrës zyrtare ose autorizimeve publike”.

Në një komunikatë të Prokurorisë bëhet e ditur se sipas aktakuzës, me datë 16.07.2020, rreth orës 11:00 min., në Prizren, në automjetin zyrtar – kombi policor dhe në stacionin policor “Alfa”, kanë keqpërdorur detyrën zyrtare.

“Të akuzuarit e lartcekur në cilësi të personave zyrtarë, në kuadër të NJSO - Prishtinë, kanë keqpërdorur detyrën apo autorizimet e tyre, keqtrajtojnë, frikësojnë dhe fyejnë rëndë dinjitetin e personave tjerë, të dëmtuarve: I.K., L.K., E.K., dhe N.D., në atë mënyrë që pasi i fusin në automjetin-kombi të policisë, gjatë transportimit të tyre prej sheshit ‘Shatërvan’ gjer në Stacionin Policor ‘Alfa’ në Prizren, derisa të dëmtuarit ishin me pranga në duar, të njëjtit i keqtrajtojnë me fjalë të rënda fyese dhe sharje ndër më të ndryshmet. Po ashtu, të njëjtit i keqtrajtojnë duke i sulmuar fizikisht, me shuplaka dhe grushte, me ç’rast i dëmtuari I.K., dhe L.K, pësojnë lëndime trupore të shkaktuara nga goditja me mjet të fortë dhe të rëndë”, thuhet në komunikatë.

Prokurori i çështjes me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartcekur për veprat penale për të cilat akuzohen të shpallen fajtorë dhe të dënohen sipas ligjit.

commentFirst article
Më të lexuarat
Sot mund të lexoni Shfletoni kopertinat