Katër persona kanë rënë në prangat e policisë për trafikimin e 1074,2 kg kanabis me kamionë nga pika kufitare e Kapshticës.
Të arrestuarit janë shtetasit:
• A.S, 47 vjeç;
• Z.H, 56 vjeç;
• A.M, 50 vjeç;
• M.S, 30 vjeç.
Policia sqaron se "në dalje të Republikës së Shqipërisë u paraqitën 2 mjete, tip kamion. Gjatë kontrollit të imtësishëm si edhe skanimit të mjeteve, u gjet dhe sekuestrua një sasi 1074,2 kg lëndë e dyshuar narkotike kanabis".
Nga kryerja e veprimeve të mëtejshme hetimore, u arrestuan drejtuesit e mjeteve dhe dy bashkëpunëtorë të dyshuar të tyre, si të implikuar.
Në cilësinë e provës materiale u sekuestruan disa mjete, sasi monetare dhe telefona.
Materialet i kaluan për ndjekje Prokurorisë pranë Gjykatës së Shkallës së Parë për Krime të Rënda Tiranë.
