Bashkia e Lezhës vijon punën në bregdetin e Shëngjinit, për krijimin e kushteve sa më të përshtatshme për sezonin e ri turistik.
Punonjësit e bashkisë po pastrojnë rërën e sjellë nga dallgët pranë shëtitores, si dhe po pastrohet lulishtja përgjatë saj.
Sipas bashkisë brenda pak ditësh fillon puna për mbjelljen e pemëve dekorative, duke garantuar një sezon turistik të mrekullueshëm.
Bashkia e Lezhës po tregon kujdes dhe vëmendje për gjithë bregdetin e Lezhës dhe zonat e tjera turistike për të krijuar gjithë kushtet e nevojshme që pushuesit, vizitorët e turistët e huaj të kalojnë një sezon turistik të qetë e sa më komod.
Pastrimi i mjediseve publike në bregdet, qytete dhe njësitë administrative, me kontraktimin e firmave të reja të pastrimit, po shkon drejt normalizimit të plotë.
Ndërthurja e turizmit bregdetar me atë historik e natyror dhe kulinaria e pasur e bëjnë Lezhën një destinacion për turizëm gjithëvjetor.
I ndodhur në kryqëzim të rrugëve tregtare, historike e kulturore, pjesë e rëndësishme e kujtesës historike kombëtare, Lezha ka krijuar një përvojë të konsoliduar në fushën e turizmit. Vetëm 53 km larg kryeqytetit, qyteti i Lezhës ofron vlera të mëdha turistike, me objekte historike muzeale, arkeologjike si dhe objekte kulti si Kisha Françeskane e ndërtuar në vitin 1240. /ATSH