Kreu i PD-së Lulzim Basha ka folur sërish për mediat e huaja në lidhje me situatën politike në Shqipëri.
Pas dorëzimit të mandateve nga opozita, Shqipëria ka tërhequr vëmendjen e medieve ndërkombëtare.
Gjatë një prononcimi për agjencinë Associated Press, kreu i opozitës është shprehur se djegia e mandateve ka të bëjë me faktin se parlamenti është zgjedhur jo me votat e popullit, por ato të krimit të organizuar që bashkëpunoi me qeverinë.
‘Parlamenti ynë nuk është produkt i votës së popullit, por siç është bërë e ditur nga përgjime të prokurorisë të publikuara nga media ndërkombëtare, është produkt i krimit të organizuar që ka bashkëpunuar me qeverinë aktuale’, është shprehur kreu i demokratëve.
Basha ka bërë të ditur se protestat e opozitës do të shtrihen në të gjithë vendin, ndërsa i ka bërë thirrje qeverisë për një zgjidhje politike. Të mërkurën në Tiranë do të mbërrijë një delegacion i parlamentit europian, i cili do të takojë liderët politike të dy poleve, në përpjekje për të ndihmuar në zgjidhjen e situatës.