Qeveria shqiptare parashikon të marrë 30 milion euro kredi për investimet në sektorin elektroenergejtik në vend. Tashmë Këshilli I Ministrave ka depozituar në Kuvend për ratifikim marrëveshjen e bashkëpunimit financiar për projektin “Programi i investimeve për shpërndarjen e energjisë elektrike”, të nënshkruar me qeverinë gjermane në vitin 2016, e cila parashikon marrjen e një huaje të butë nga KFW, me vlerën e mësipërmes si dhe një shumë financimi prej 2 milion euro për masat e nevojshme shoqëruese për zbatimin dhe mbikëqyrjen e projektit.
Kredia parashikohet të shkojë për mbështetjen e sektorit elektroenergjetik, duke synuar përmirësimin e rrjetit të shpërndarjes së energjisë elektrike, reduktimin e humbjeve të energjisë elektrike në rrjetin e shpërndarjes, si dhe rritjen e cilësisë dhe sigurisë së furnizimit me energji elektrike për klientët në Shqipëri. Sipas relacionit, që shoqëron proejktiligjin në Kuvend, ky projektligj nuk është planifikuar në programin e përgjithshëm analitik të projektakteve për vitin 2019 të Ministrisë së Infrastrukturës dhe Energjisë, por nisur nga rëndësia që paraqet ky financim për sektorin elektroenergjetik, qeveria e konsideron si të domosdoshëm ratifikimin sa më shpejt të tij.
Kjo mund të lidhet edhe me faktin se një pjesë e kësaj huaje parashikohet të shkojë për rinovimin e godinave të qytetit student sipas parimit të eficencës së energjisë, si një nga kërkesat kryesore të studentëve gjatë protestave të zhvilluara në muajin dhjetor.