Ditët e nesërme kryeministri Edi Rama ka planifikuar një vizitë në qytetin e Shkodrës, ku do të takohet me strukturat e PS-së në këtë qytet për zgjedhjet vendore.
Por pas reagimit të Partisë Demokratike dega Shkodër, e cila i kujtoi kreut të qeverisë se nuk është i mirëpritur, ka ardhur edhe reagimi i kryetares së bashkisë, Voltana Ademi.
Përmes një postimi të gjatë në Facebook, qytetarja e parë e Shkodrës i kujton Ramës persekutimin 6-vjeçar të qytetit më të madh në veri të vendit.
“Pak orë pasi shembi piedestalin ku do të vendosej shtatorja e Skenderbeut në 575- vjetorin e Kuvendit të Lezhës, Edi Rama vjen të provokojë Shkodrën. Ai që e quan veten kryeministër, sepse shkodranët ia kanë hequr vizën me kohë, do të organizojë një takim partie me strukturat e mbetura të “Rilindjes” së tij që zëvendësoi PS-në, ndjesë pastë”, shkruan Ademi.
Reagimi i plotë i Voltana Ademit:
Edi Rama provokon Shkodrën pasi e persekutoi përgjatë 6 viteve keqqeverisje!
Pak orë pasi shembi piedestalin ku do të vendosej shtatorja e Skenderbeut në 575- vjetorin e Kuvendit të Lezhës, Edi Rama vjen të provokojë Shkodrën. Ai që e quan veten kryeministër, sepse shkodranët ia kanë hequr vizën me kohë, do të organizojë një takim partie me strukturat e mbetura të “Rilindjes” së tij që zëvendësoi PS-në, ndjesë pastë! Për ironi të fatit, në qytetin që e la nën pushtetin e krimit nga 2013-a, do të vijë bashkë me ministrin e brendshëm. Në qytetin ku ministrja e tij e arsimit nuk denjoi të takojë studentët, Rama vjen përsëri me Shahinin e tij në krah!!!
Askush më mirë se shumica e shkodranëve, nuk e njohin më mirë fytyrën e vertetë të Edi Ramës. I dënoi me mungesë investimesh, i dënoi me papunësinë, i dënoi me emigracionin ekonomik, i dënoi edhe me kafshatën e gojës duke iu hequr ndihmën ekonomike mijëra familjeve.
Vetëm një i papërgjegjshëm mund të merrte guximin të vinte në qytetin që e persekutoi për 6 vjet, në kuptimin e plotë të fjalës, ashtu siç bënë për 45 vite etërit e tij shpirtrorë por edhe biologjikë.
Me forcën e shtetit që e ke privatizuar, ti kërkon të vish në Shkodër Edi Rama. Pretendon se mund të takosh edhe atë grusht të vogël njerëzish që të kanë mbetur në “Rilindje”, rrethuar me gardista e badigardë, mbase edhe me tela me gjemba siç bëre me parlamentin e shqiptarëve. Por në Shkodër nuk je i mirëpritur, nuk je i mirëseardhur sepse për 6 vite, vetëm ke përkeqësuar e vështirësuar jetën e shkodranëve.
Shkodranët i ke patur, i ke dhe do ti kesh në Tiranë, para parlamentit, para kryeministrisë deri sa të ikësh sepse do të ikësh. Ikja jote i hap rrugën Shqipërisë drejt Europës, i hap rrugën zgjedhjeve të lira e të ndershme, rikthen normalitetin në këtë vend.
Edi Rama, mos e provoko Shkodrën e shkodranët! Ne nuk harrojmë!
