Kreu i Partisë Demokratike në Fier, Luan Baçi tha para gjykatës së qytetit, se një tjetër person është arrestuar në lidhje me protestën e së shtunës së shkuar kundër kryeministrit Edi Rama. Ai tha se qyteti është kthyer në shtetrrethim nga policia në përpjekje për të trembur qytetarët për protestën e së shtunës.
Luan Baçi: Para se të fillonte seanca, këta kanë vazhduar me arrestime të tjera. Është arrestuar një qytetar tjetër i Fierit, ish-futbollisti i njohur fierak, Pandeli Tole. E arrestuan sot pasi është edhe kryetar i grup-seksioni. Fieri ka rreth një javë i vendosur në shtetrrethim.
Sot nuk lejoheshin për të hyrë as në makinë në rrugët dytësore. Një ndalim i tillë nuk është vënë re ndonjëherë në Gjykatën e Fierit as kur kanë sjellë vrasës. Nuk e besoj dot këtë terror që u bëhet qytetarëve fierakë, pas ardhjes së kryeministrit. Është një metodë për t'i trembur qytetarët fierakë. Seanca e sotme tregoi që gjithë kjo reprezalje që po bëjnë. Është protesta e 16 shkurtit për ta sfumuar sa më shumë. Protesta e 16 shkurtit do të jetë më e madhe.
