Rudina Hajdari në kundërshtim me deputetët e tjerë të Partisë Demokratike, vendosi të mos e djegë mandatin por të qëndrojë në Parlament.
Por ndryshe prej saj mendon i vëllai Kiri Hajdari, i cili është parë krahë kryedemokratit Lulzim Basha në protestat e opozitës.
I ftuar në “Zonë e Lirë” këtë të premte, Edi Paloka tha dy fjalë lidhur me vendimin e vajzës së Azem Hajdarit.
“Rudinën e njoh pak, sepse ajo ka qenë e vogël. Jo vetëm për respekt të Azemit, por sepse i kam miq. Nuk dua të merrem me rastin e Rudinës. Të tjerët janë për interesat e veta, jo të partisë. Për Rudinën, do thoja vetëm diçka që, në momentin kur fjalët e tua inspirojnë Taulant Ballën, duhet të pyesësh veten çfarë nuk shkon. Mbasi ajo deklaroi se nuk do të dorëzojë mandatin, doli Taulanti dhe tha u inspirova nga fjalët e saj. Në këtë moment, ti duhet të dyshosh për atë që ke bërë”, u shpreh ai.
Paloka po ashtu tha se nuk është penduar për lënien e mandatit, sepse sipas tij ka qenë një nga personat që e ka kërkuar këtë veprim.