Presidenti i Republikës, Ilir Meta ka folur për studentët dhe ligjin e arsimit të lartë. Në 10-vjetorin e Universitetit Mesdhetar të Shqipërisë, kreu i shtetit ka deklaruar se protestat e drejta të studentëve treguan se zbatimi i ligjit aktual të Arsimit të Lartë ka probleme.
Meta: Protestat e drejta të studentëve gjatë dhjetorit të kaluar treguan se zbatimi i ligjit aktual të Arsimit të Lartë ka probleme dhe vështirësi për të siguruar autonominë dhe pavarësinë financiare të universiteteve publike. Reforma në Arsimin e Lartë dhe kërkimi shkencor duhet të ketë një frymë më gjithëpërfshirëse. Reforma në Arsimin e Lartë duhet të synojë krijimin e kushteve të duhura për të përmirësuar cilësinë e mësimdhënies dhe të synojë që universitetet të jenë të pavarur dhe të pakushtëzuar nga politika.
Duke folur për kartën e studentit, Meta tha se vonesat janë të pajustifikaura.
Meta: Vonesa e pajisjes së studentëve me “Kartën e Studentit” është e pajustifikuar . Ajo është detyrim imediat për t’u garantuar studentëve të drejtave që burojnë prej saj ashtu si të studentëve të tjerë në vendet e rajonit dhe të Evropës.
