Prej më shumë se një orë në selinë e PS-së vazhdon takimi i kreut të kësaj partie, njëherësh dhe kryeministër i vendit, Edi Rama, me krerët e qarqeve për të përcaktuar kandidatët e zgjedhjeve vendore të 30 qershorit.
Gazetarja e RTV Ora Nertila Dosti raportoi se Rama po zhvillon takime veç e veç me drejtuesit politik të qarqeve.
Të pranishëm janë dhe kreu i grupit parlamentar Taulant Balla dhe kreu i Kuvendit Gramoz Ruçi.
I pari në takim ka hyrë drejtuesi politik i qarkut të Durrësit Vangjush Dako, i cili këtë herë nuk do të rikandidojë për bashkinë e këtij qyteti.
"Orët e fundit është përfolur një emër, Valbona Sako, drejtore e Tatimeve në Durrës, megjithatë pritet dita e nesërme ku do të jetë dhe Kryesia e kësaj partie që do të konfirmojë ose jo ketë emër për kandidate për bashkinë e këtij qyteti" raportoi gazetarja Dosti.
Janë edhe disa Bashki që mbeten në pikëpyetje si Saranda, Gjirokastra, Durrësi, Vora, Kavaja dhe Dibra.
Të shtunën PS do të publikojë listën e plotë të kandidatëve për 61 bashkitë e vendit por edhe kandidatët për këshilla bashkiakë.
