Autori i dyshuar i vrasjes së ish-policit Arben Bilali, Gjergj Cukali ka dalë para gjykatësit për tu njohur me masën e sigurisë.
Seanca gjyqësore është ndërprerë pasi avokati i Cukalit kërkoi të njihej me materialet e dosjes Prokurorisë.
Cukali dyshohet se vrau ish-policin Bilali më 30 janar.
Arrestimi i Cukali 4 muaj pas vrasjes- 40-vjeçari, i njohur ndryshe dhe si i forti i "Myslym Shyrit", u arrestua më 31 maj.
Arrestimi i Cukalit është kryer në zonën e "Vasil Shantos", zonë nga ku ishin gjurmuar dhe ndjekur lëvizjet e ish-policit.
Sipas burimeve mësohet se identifikimi i Cukalit është kryer pas hetimeve intensive dhe gjurmëve të gjetura në automjetin e përdorur për ekzekutimin e 50-vjeçarit Bilali.
Identifikimi i Cukalit mësohet se është bërë nga analizat e ADN-se te marra nga një shishe ujë gjendur në makinën e përdorur pas vrasjes së Bilalit.
Pas atentatit në zonën e Selitës autorët u larguan me makinë duke tentuar që ta djegin në Bathore, por edhe pse e spërkatën me benzinë nuk arritën ta digjnin atë pasi policia arriti në kohë për të shuar flakët.
Kqyrja e mëvonshme në makinën e përdorur në atentat evidentoi prova të forta përsa i përket autorëve.
40-vjeçari i arrestuar për ekzekutimin e 50-vjeçarit është një person i njohur për policinë, pasi është arrestuar për disa vepra penale, si trafik droge, armëmbajtje pa leje dhe rrëmbim personi.
Autori i dyshuar Cukali nuk ka qenë i vetëm në ekzekutimin e Bilalit, ndaj burimet sqarojnë se po punohet dhe për identifikimin e personave të tjerë.
Ngjarja e rëndë u shënua pasditen e 30 janarit të këtij viti. Ish-polici, Arben Bilali, u ekzekutua me breshëri kallashnikovi para banesës së tij në zonën e Selitës.
