Sot në emisionin “Me Zemër të Hapur” në News24 është rikthyer historia e nënës së tre fëmijëve e cila një javë më parë rrëfeu se i rrezikohet jeta nga bashkëshorti. 24-vjeçarja Viola Dodaj bëri apel për të marrë në kujdestari fëmijët.
Ajo rrëfeu se u martua me bashkëshortin në vitin 2011, kur ishte vetëm 15 vjeçe e nga martesa erdhën në jetë tre fëmijë. Ajo e akuzoi ish-bashkëshortin se e ka dhunuar sistematikisht dhe se luante bixhoz.
Nëna e tre fëmijëve vendosi ta denoncojë për dhunë në familje për herë të parë bashkëshortin në 2015, por asokohe e ndodhur në dilemë për të mos lënë fëmijët pa baba ajo e tërhoqi denoncimin dhe e fali.
Bashkëshorti edhe pas kësaj situate nuk ndryshoi qëndrim, sërish në familje filloi dhuna, thotë ajo. “Jam rrahur me kabull korrenti dhe dhunuar në mënyrë çnjerëzore, madje edhe më ka kërcënuar me vdekje. Në tetor të vitit të kaluar e gjendur përball kësaj situate vendosa të largohem nga banesa ku jetoja”, ka rrëfyer Viola historinë e saj.
Në një lidhje ‘skype’ nëna tha se ndodhet jashtë Shqipërisë, e larguar për shkak të dhunës dhe bëri apel për ndihmë dhe për ribashkim me fëmijët.
Por sot në studio ka ardhur edhe rrëfimi i ish-bashkëshortit të saj, Andreas i cili kërkoi ballafaqim me të. Ai mohoi se ka ushtruar dhunë ndaj Violës, edhe pse ajo ishte pajisur disa herë me urdhra mbrojtje. Andrea e akuzoi për disa lidhje të tjera jashtëmartesore nënën e fëmijëve të tij dhe tha se persona të tjerë e kanë dhunuar dhe jo ai.
“Unë e Viola kemi rënë dakord që fëmijët të mi linte mua dhe kjo të vazhdonte jetën e saj të luksit siç e kishte qejf, të shkonte tek nëna e vet në Itali. Ne jetojmë për fytyrë. Viola e rrinte vajzën, fëmijët vetëm që të mos më takonin mua. Unë gjithmonë e kam ëndërruar familjen si gjënë më të shtrenjtë në botë. Unë e kam pas mendjen për familje, kjo e ka pas mendjen për me bo qejfin e vet. Violën e ka rrahur i dashuri. Në 2015 kanë filluar problemet e para.
Ajo ka dashur të marrë prokurën nga unë për azil. E kanë mësuar. Fëmijët e mi i kanë thirrur baba për 2 muaj burrit të nënës. Fëmijët mund t’i thonë të gjitha”, tha ish-burri i saj.Nga ana tjetër e deti, Viola nëpërmjet lidhjes ‘skype’ mohoi se ka pasur lidhje të tjera duke qarë vazhdimisht. Ajo tha se e kanë detyruar të firmosë që t’i lërë fëmijët me babain.
“Vjehrra ka ardhur në shtëpinë ku banoja dhe më tha firmos që do ia lësh fëmijët se do të vrasë, do të hedhë trutë në erë”, tha Viola.
“Nuk të toleroj të thuash këto gjëra. Boll ke luajtur me mua. Më ke marrë 15 vjeçe. Kam bërë shumë për familjen tënde”, theksoi ajo.
Ndërkohë Andrea tregoi për fëmijët, ai tha se djalin e merr malli për të ëmën. “Djali ndonjëherë më thotë për të ëmën që i mungon. Thotë babi më ka dalë loti”, tregoi Andrea.
Megjithë akuzat e kundërakuzat mes dy ish-bashkëshortëve, me ndërmjetësimin e stafit të emisionit “Me zemër të hapur”, avokatëve dhe psikologëve, Viola dhe Andrea ranë dakord që për hir të tre fëmijëve të komunikojnë e të merren vesh. “T’i ulim armët për hir të fëmijëve e të flasim. E as unë nuk t’i ndaloj fëmijët, e as ti mos mi ndalo”, tha Viola. Nga ana tjetër Andrea tha se do respektojë vendimin e gjykatës.
