Kryeministri i Shqipërisë, Edi Rama në 55 vjetorin e lindjes falënderoi qytetarët shqiptarë që i kanë shprehur urimet për ditëlindjen e tij, ndërsa përcjell mesazhin e Presidentit amerikan Lincoln ‘Rëndësi ka jeta në vitet e tua’.
Rama e ka shoqëruar falënderimin për mesazhet e urimit duke publikuar edhe një fotografi të tijën në vitet e rinisë dhe një të ditëve të sotme.
“Faleminderit pafund dhe ndjesë për pamundësinë që t’u përgjigjem një për një, urimeve tuaja të pafundme për 55 vitet e mia”, shprehet Kryeministri Rama.
Kreu i qeverisë thekson se “tek e fundit s’kanë rëndësi vitet e jetës tënde. Ka rëndësi jeta në vitet e tua”, thoshte Presidenti Lincoln”.
Ditën e sotme, kryeministri Rama e nisi ditën me një urim për 243 vjetorin e Pavarësisë së Shteteve të Bashkuara të Amerikës. Por ndjekësit në këtë postim i kanë shkruar mesazhe urimi për ditëlindjen e tij.
