“E trajtuan si artist të degjeneruar”, Rama citon aktorin e radhës: Ja ç’thotë për Teatrin

Shqipëria

“E trajtuan si artist të degjeneruar”, Rama citon aktorin e radhës: Ja ç’thotë për Teatrin

Më: 2 gusht 2019 Në ora: 15:18
Edi Rama

Një tjetër emër në radhët e artistëve ka mendimin që godina ekzistuese e Teatrit Kombëtar duhet të shembet dhe të ndërtohet aty një i ri.

Ashtu siç ka bërë prej ditësh, i pari i qeverisë Edi Rama vijon të postojë në rrjet statuse të artistëve dhe aktorëve të ndryshëm që janë pro prishjes së godinës ekzistuese të Teatrit Kombëtar. Kësaj here ai ka ndarë statusin e aktorit, Ardian Cerga.

“Ardian Cerga u shfaq në vëmendjen e publikut, si një profil i ri dhe jashtë kornizës së asaj kohe, kur pati fajin se i ngjante më shumë gansterëve që interpretonte Alen Deloni, se sa partizanëve apo ballistëve të Realizmit Socialist. E trajtuan si një artist të degjeneruar dhe e degdisën në Shtëpinë e Kulturës së Beratit, pa të drejtë aktrimi!

Edhe Ardian Cerga e ka një opinion për çështjen e teatrit dhe si të gjithë ata që duan teatrin përpara politikës dhe nuk kapen pas politikës për të bërë teatër, ai mbështet shembjen e ngrehinës ekzistuese dhe ndërtimin e Teatrit të Ri Kombëtar, ne të njëjtin territory”, shkruan Rama, ndërsa citon edhe mesazhin e aktorit Ardian Cerga.

“Domosdoshmëria e një teatri të ri është evidente! Po njësoj është evident fakti i gjendjes dhe strukturës së mjerueshme të ngrehinës së teatrit, e cila për fat të keq nuk afron më asgjë perveç një lloj nostalgjie paksa naive, meqë në skenën e këtij teatri kanë interpretuar kollosët e artit skenik. Kjo më sjell në mendje polemikën e një viti më parë për ndalimin e filmit shqiptar, ku shumë pak u prononcuan në mbrojtje të figurave të shquara të ekranit, të cilat sot po trajtohen sikur do të humbasin vlerën e tyre po të shemben muret e ngrehinës teatër… Qesharake!

Si qytetar dhe si aktor shqiptar, e shikoj të domosdoshëm ndërtimin e një teatri të ri me të gjithë parametrat që koha kërkon; gjithmonë në vendin egzistues dhe në territorin e tij natyrisht! Ndërsa për respekt të figurave të shquara mund të krijohet brenda ambientit të teatrit të ri një hapësirë muzeale, ku të nderohen siç duhet dhe jo kështu si sot, që vetëm përdoren si alibi kundër teatrit të ri! Një teatër i ri do të thotë edhe një mentalitet i ri…”

Sot mund të lexoni Shfletoni kopertinat