Zëvendës Drejtoresha e Kadastrës Durrës, Lusiena Kola është arrestuar, ndërkohë që është shpallur në kërkim ish-drejtori i ALUIZNI-t të qytetit, Flamur Gjuzi, të dyshuar se kanë shpërdoruar detyrën në legalizimin dhe regjistrimin e disa pronave të paluajtshme, kryesisht në bregdet.
Kola, aktualisht Punonjësje e Kadastrës, Durrës, është lënë në masë “Detyrim paraqitje” nga Gjykata e Shkallës së Parë të qytetit bregdetar, ndërkohë që është shpallur në kërkim ish-drejtori i ALUIZNI-t, Flamur Gjuzi.
Në komunikatën e Policisë së Shtetit ngjarja nuk është pasqyruar. Zyrtarët kanë shpërdoruar detyrën në legalizimin dhe regjistrimin e disa pronave të paluajtshme.
Dyshja në bashkëpunim edhe me zyrtarë të tjerë, dyshohet se u kanë dhënë disa shtetasve, në kundërshtim me ligjin, dokumentat e pronësisë në zonën bregdetare, por edhe në pjesë të tjera të qytetit të Durrësit.
Ditën e premte, Dosja.al njoftoi se u shoqëruan në komisariat punonjës të Kadastrës, ndërkohe që të shtunën, prokuroria ka kërkuar për shtetasen Lusiena Kola masën “Arrest me burg”, por gjykata vendosi masën “Detyrim paraqitje”.
