Një ditë pas publikimit të projekt-opinioninit të Komisionit të Venecias, sipas të cilit presidenti Ilir Meta ka tejkaluar kompetencat duke shtyrë datën e zgjedhjeve të 30 Qershorit, deputeti socialist Alket Hyseni i ftuar në RTV Ora deklaroi se Komisioni Hetimor për shkarkimin e Metës do të vijojë hetimin që do të finalizohet me hartimin e një raporti.
Më pas ky raport, tha Hyseni, do ti paraqitet Kuvendit i cili do të marrë vendimin politik nëse jemi në rrethanat e parashikuara nga dispozitat konkrete kushtetuese për shkarkimin e Presidentit të Republikës.
Nëse vendos që "PO", atëherë raporti do ti referohet Gjykatës Kushtetutës si filtri fundor.
Alket Hyseni: Shkarkimi ose jo është një çështje proceduriale tani. Ne do të mbarojmë hetimin në Komisionin Hetimor në kontekst të ekspertizës që bëjmë aty. Raporti do ti paraqitet seancës plenare. Është Kuvendi i Shqipërisë si institucion që do të marrë vendimin politik. Nëse Kuvendi do të marrë vendimin se janë rrethanat për shkarkim i kalon Gjykatës Kushtetuese. Dhe është Gjykata Kushtetuese si filtri fundor që do të vendosë nëse jemi në rrethanat e parashikuara nga dispozitat konkrete kushtetuese për shkarkimin e Presidentit të Republikës. Sa i takon aspektit politik, pritshmëritë e gjithë publikut janë që presidenti i Republikës ti qëndrojë angazhimit të marrë publikisht për dorëheqje pasi Komisioni i Venecias në raportin paraprak e ka deklaruar shkeljen e Kushtetutës. Por le të presim raportin përfundimtar dhe ta bëjmë atë zyrtarisht publik dhe unë bvesoj se Presidenti do të gjejë kurajon që në nderim të institucionit dhe personit të tij të marrë vendimet e duhura duke lehtësuar edhe Gjykatën Kushtetuese nga një moment i tillë.
Komisioni Hetimor për shkarkimin e Presidentit duhet të mbyllej me datë 8 tetor, por më 17 shtator afati i tij u shty edhe me 2 muaj të tjerë.
