20 vjeçarja Xhesika Biqiku ishte viktima e vetme e tërmetit të 26 nëntorit në Tiranë. Studentja e Arkitekturës humbi jetën poshtë pallatit të saj në Kombinat, ku disa tulla u shkëputën nga tarraca dhe i shkaktuan vdekjen.
Në rrezik shembjeje janë edhe parapetet e disa pallateve të tjerë ngjitur me atë ku humbi jetën 20 vjeçarja. ABC News ka ndjekur operacionin e forcave zjarrfikëse në Kombinat për largimin e një strukture të rrezikshme në lartësinë e një pallati që mund të sillte një tjetër tragjedi në këtë zonë.
Lëkundjet e tërmetit që tronditën sërish Shqipërinë mëngjesin e dielës me magnitudë 4, kanë lëkundur sërish godinat e dëmtuara nga tërmeti i fortë i 26 nëntorit. Ky është pallati që dy javë më parë i mori jetën studentes së Arkitekturës, Xhesika Biqiku.
Atë mëngjes 20 vjeçarja nxitoi të largohej nga banesa pas lëkundjeve të forta, por shkëputja e disa tullave nga parapetat e katit të pestë të pallatit i morën jetën.
Pak metra larg pallatit ku humbi jetën Xhesika, një tjetër objekt banimi pas lëkundjeve të mëngjesit të sotëm është kthyer në një rrezik për banorët e kësaj zone të Kombinatit.
Efektivë të Policisë Bashkiake kanë vendosur perimetrin e sigurisë për banorët, ndërkohë që Shefi i Zjarrfikëseve të Kombinatit Luan Shehu drejton operacionin për heqjen e parapeteve që përbëjnë rrezik.
Në katin e pestë efektivë të zjarrfikëseve ndërhyjnë për të hequr tullat e lëvizshme dhe parapetet që përbëjnë rrezik për jetën e banorëve.
Për më shumë se 30 minuta punonjës të shërbimit zjarrfikës punuan për të larguar pjesët e rrezikshme, ndërkohë që do të jenë ekspertët ata të cilët do të vendosin për mënyrën e ndërhyrjes në objekt.
Parapetet e kateve të sipërme, për shkak të amortizimit por edhe peshave të shtuara të depozitave janë kthyer në një rrezik të shtuar për banorët që jetojnë në këtë zonë.
Shërbimet e zjarrfikëseve janë duke punuar për largimin e pjesëve të dëmtuara por banorët ende janë në pritje të një ndërhyrjeje më të specializuar që të ofroj siguri për jetën e tyre.
