Presidenti i Këshillit të Ambasadorëve, Besnik Mustafaj, e cilëson si mjaft të rëndësishme vizitën e kryeministrit Edi Rama në Rusi, në cilësinë e drejtuesit të OSBE-së.
Në takimin që do të ketë me ministrin e Jashtëm, Sergei Lavrov, Mustafaj thotë se Edi Rama duhet të kërkojë njohjen e pavarësisë së Kosovës.
Ish-ministri i Jashtëm që e vizitoi Rusinë në vitin 2006 thotë se takimi i Ramës me Lavrovin duhet të shërbejë edhe për t’i hapur rrugë dialogut mes dy vendeve.
Mustafaj nuk e kursen as një këshillë për Edi Ramën.
“Të mos mendojë se ky është një rast për protagonizmin e tij personal. OSBE-ja nuk është organizatë protagonistësh”, thotë ai për a2.
Takimi i kryeministrit Edi Rama me Sergei Lavrov është parashikuar në 26 shkurt. Parandalimi i përshkallëzimit të konfliktit në Ukrainë, të cilën Shqipëria e ka ndër prioritetet e kryesimit të saj të OSBE-së, pritet të jetë ndër temat kryesore të takimit.
