Rama firmos vendimin me Bankën e Shqipërisë, shtyhen sërish me tre muaj këstet e kredive - Bota Sot
Rama firmos vendimin me Bankën e Shqipërisë, shtyhen sërish me tre muaj këstet e kredive

Shqipëria

Rama firmos vendimin me Bankën e Shqipërisë, shtyhen sërish me tre muaj këstet e kredive

Më: 28 maj 2020 Në ora: 18:44
Rama firmos vendimin me Bankën e Shqipërisë, shtyhen sërish me tre muaj këstet e kredive

Kryeministri i vendit, Edi Rama, ka njoftuar se ka firmosur sot me Guvernatorin e Bankës së Shqipërisë, Gent Sejko vendimin për shtyrjen tremujore të kësteve të kredive deri në 31 gusht 2020.

Lajmi u publikua nga shefi i mazhorancës në faqen e tij zyrtare në “Facebook”. Sipas Ramës, Banka e Shqipërisë ka miratuar po ashtu një lehtësim për bankat e nivelit të dytë, që të bëjnë ristrukturime proaktive të kredive deri në 31 dhjetor 2020, me shtrirje një ose disavjeçare.

“Bashkëfirmosëm me Guvernatorin e Bankës së Shqipërisë një shtyrje të mëtejshme tremujore të kësteve të kredive deri në 31.08.2020. Gjithashtu Banka e Shqipërisë miratoi një lehtësim për bankat e nivelit të dytë, që të bëjnë ristrukturime proaktive të kredive deri në 31.12.2020 me shtrirje një ose disavjeçare, sipas shkallës së vështirësive të çdo biznesi”, shkruan Rama.

Ky vendim i qeverisë mund të konsiderohet si një lajm i mirë për të gjithë ata qytetarë dhe biznese të cilat nuk kanë patur të ardhura të mjaftueshme, për shkak të pandemisë globale të COVID-19.

Shfaq komentet
comments powered by Disqus
Sot mund të lexoni Shfletoni kopertinat