Indrit Bajraktari, 25-vjeçari që drejtonte motorin e ujit nga ku ra vajza 17-vjeçare Enisa Doda, që u gjet e mbytur në Velipojë, ka folur përpara policisë.
Sipas raportimeve të mediave në Shqipëri, ai ka deklaruar se e ka nxjerrë vajzën në breg dhe ia ka dorëzuar xhaxhait të saj. Deklaratën e njëjtë e ka thënë edhe para rojeve të plazhit, kur këta të fundit e kanë pyetur se ku ndodhet vajza.
Por, deklarata e tij hidhet poshtë nga policia, pasi ata thanë se vajza është gjetur e mbytur rreth 800 metra larg bregut. Bëhet e ditur se trupi i vajzës është gjetur nga peshkatarët të cilët e kanë njoftuar menjëherë policinë.
Sipas ekspertizës, vajza ka pësuar goditje në trup, që dyshohet se i janë shkaktuar nga përplasja e motorit të ujit.
17-vjeçarja nga Burreli që jetonte në Bathore kishte ardhur për pushime në Velipojë, bashkë me familjen e saj.
Ndërsa, 25-vjeçari nga Postriba ishte emigrant në Londër dhe kishte ardhur në Shqipëri për pushime.
Indrit Bajraktari nga ana tjetër, rezulton të jetë i martuar në shtetin anglez. Ku edhe pritet të bëhet prind, pasi gruaja e tij rezulton se është shtatzënë.
Indriti dhe Enisa nuk ishin njohur më parë, dyshohet se janë njohur gjatë pushimeve në Velipojë nëpërmjet rrjetit social Facebook.