Sherr për një targë motori, 10 vjet më pas tre shqiptarë marrin dënime të rënda

Shqipëria

Sherr për një targë motori, 10 vjet më pas tre shqiptarë marrin dënime të rënda

Më: 28 tetor 2020 Në ora: 16:15
Foto Ilustrim

Një sherr i dhjetë viteve më parë, mbyllur me një plagosje me thikë, u ka kushtuar shtrenjtë tre shqiptarëve, banorë në Tolentino, teksa kanë marrë dënime të rënda nga drejtësia italiane.

Njëri prej tyre është dënuar me 10 vjet burg, dy të tjerët me nga 9 vjet, të akuzuar dhe shpallur fajtorë për tentativë vrasjeje.

Ishte një sherr banal të rinjsh, për një targë motori, por që përfundoi me një plagosje me thikë, me autor babanë e njërit prej të dënuarve, i cili nuk jeton më.

Ngjarja ka ndodhur më 11 mars 2010, rreth orës 7 të mbrëmjes, para barit Enals në rrugën Vittorio Veneto në Tolentino.

Aty shpërtheu grindja midis një 22-vjeçari dhe shqiptarit M.M., në atë kohë 19 vjeç. Të pranishëm ishin edhe dy shqiptarët e tjerë të dënuar, Z.S. dhe E.K., të dy 20-vjeçarë në atë kohë.  

Në kulmin e debatit, ndërhyn babai i M. M., i cili nxori një thikë dhe e goditi disa herë në anën e majtë të gjoksit 22-vjeçarin. Viktima arriti të largohej, fillimisht pas një makine e më pas brenda një bari, i ndjekur nga M. M.

I ati i këtij të fundit ndërkohë ka vdekur, ndërsa për të birin e dy shokët e tij vazhdoi procesi.

Prokuroria akuzoi M.M. për vrasje në tentativë, pasi vetëm një ndërhyrje kirurgjikale i shpëtoi jetën 22-vjeçarit, ndërkohë që ata kishin debatuar edhe më parë për kthimin e një targe motori.

Ditën e ngjarjes, para sherrit, 19-vjeçari i kishte kërkuar baristit të Enals t’i ngrinte zërin muzikës, ndërsa pas plagosjes me thikë e ndoqi viktimën deri në hyrjen e barit ku ai u fut, duke i ulëritur: Mos ma ngri zërin mua!

Për dy të tjerët, akuza shpjegon se edhe ata e kishin ndjekur viktimën dhe njëri prej tyre e kishte gjuajtur me sëpatë nga larg, duke i akuzuar të tre se kishin vazhduar aktin kriminal të babait të M.M.

Sot trupi gjykues mori vendimin, duke dënuar me 10 vjet M.M., tashmë 29-vjeçar, dhe me 9 vjet Z.S. dhe E.K., tani 30 vjeç. U vendos edhe një shpërblim 12 900 euro për personin e dëmtuar.

Avokatja e shqiptarëve e cilësoi dënimin si një skandal juridik, duke thënë se autor ishte babai i M.M., që ndërhyri me thikë në një grindje midis të rinjsh, ndërkohë që ata nuk e dinin se ai kishte thikë me vete dhe do të kryente një veprim të tillë.

‘I vetmi faj i M. M., që nuk e pa goditjen me thikë, ishte ndjekja nga pas e viktimës’, tha avokatja.

commentFirst article
Sot mund të lexoni Shfletoni kopertinat