Pas ngjarjes së rëndë në Gurin e Zi në Shkodër, ku një 10-vjeçar ka humbur jetën në mënyrë aksidentale, pasi po bënte një video për rrjetin social “TikTok”, ka pasur një reagim masiv të prindërve në media dhe rrjetet sociale.
Të frikësuar nga ngjarje të tilla të përsëritura ka nga ata që edhe kërkojnë mbylljen e rrjeteve sociale fare për fëmijët. Ndërsa të tjerë duket se kanë pësuar ndërgjegjësimin e radhës për të shtuar kontrollin me telefonat e fëmijëve të tyre.
Kjo ngjarje e rëndë u diskutua sot në emisionin “Wake Up”. Gazetari i Top Channel, Klodian Zhivani tregoi si ndodhi ngjarja e rëndë që ka tronditur mbarë vendin.
“Është përjetuar shumë keq në Gurin e Zi, sepse është një komuniteti i vogël dhe ngjarjet përjetohen gjatë. Ka qenë një fëmijë i dashur me shokët dhe sipas mësueses ka shfaqur gjithmonë aftësitë e një lideri. Ai ishte i pari për organizime të tilla në klasë
Nasiri ka qenë duke xhiruar për ‘TikTok’ dhe fatkeqësisht betoniera ka lëvizur dhe ai ka humbur ekuilibrin. Ka qene vetëm në momentin e ngjarjes dhe nuk kishte mundësi që dikush ta shpëtonte”, tha Zhivani.
Ndërsa pedagogia e shkencave sociale, Arjana Muçaj apeloi që prindërit t’u kushtojnë më shumë kohë fëmijëve, teksa ngriti shqetësimin për mungesën e filtrave në rrjetet sociale.
“Si ka mundësi që nuk ka filtra për fëmijët? Duhet t’u kushtojmë më shumë kohë fëmijëve”, theksoi Muçaj.
Në lidhje me këtë ngjarje tronditëse foli edhe eksperti i sigurisë kibernetike, Edmond Liçaj.
“Një fëmijë 10-vjeçar nuk duhet të kishte telefon. Të shkëputen fëmijët nga pajisjet. Prindërit duhet të jenë në brendësi, çfarë janë këto rrjetet sociale”, apeloi Liçaj.
