4-fishohet çmimi i energjisë për bizneset

Shqipëria

4-fishohet çmimi i energjisë për bizneset

Më: 10 janar 2022 Në ora: 13:53
Foto ilustrim

Bizneset që kanë dalë në treg të lirë energjie e që furnizohen nga Furnizuesi i Mundësisë së Fundit po përballen me çmime tejet të larta për sigurimin e energjisë. Për muajin nëntor ky çmim arriti në 38.73 lekë/kwh, disa fish më i lartë se muajt e parë të vitit 2021.

Më konkretisht deri në muajin qershor çmimi i energjisë për këtë kategori arrinte mesatarisht në 10.5 lekë/kwh, çka do të thotë se në muajin nëntor ai ishte gati 4 herë më i lartë.

Sipas të dhënave nga Enti Rregullator i Energjisë, tendenca në rritje e çmimeve ka nisur që prej muajit korrik, për të arritur rekordin në muajin nëntor të vitit që sapo lamë pas.

Kjo rritje vjen si pasojë e çmimit të lartë, me të cilin blihet energjia në tregun e parregulluar, duke qenë se është një prej elementëve përbërës të formulës me të cilën llogaritje çmimi i shitjes së energjisë elektrike të furnizuar nga Furnizuesi i Mundësisë së Fundit.

Nga ky çmim preken bizneset e lidhur në tensionin 35 KV, që vijojnë të furnizohen nga Furnizuesi i Shërbimit Universal.

Ndërkohë që, kjo situatë do të impaktonte edhe bizneset e lidhur në tensionin 20 KV, që prej 1 janarit 2022 do të duhej të dilnin në tregun e liberalizuar, shkruan scan.

Por, pikërisht për shkak të situatës me çmimet e larta, në ditët e fundit të muajit Ministria e Infrastrukturës dhe Energjisë njoftoi një shtyrje të këtij detyrimi edhe me 6 muaj, ndonëse procesi shtyhet prej vitesh. 

Ndërkaq, për muajin dhjetor 2021 parashikohet një rënie e lehtë e këtij çmimi, duke qenë se energjia në tregun e parregulluar është blerë pak më lirë se muajt e mëparshëm.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat