Arrestohet një grup kriminal shqiptar për kultivim dhe shpërndarje narkotikësh

Shqipëria

Arrestohet një grup kriminal shqiptar për kultivim dhe shpërndarje narkotikësh

Më: 29 janar 2022 Në ora: 06:29
Arrestimi

Në Shqipëri, policia arrestoi sot 14 persona në Dibër dhe kryeqytet, të dyshuar si pjesë e një grupi kriminal, që prodhonte dhe shiste lëndë narkotike.

Akuzat ndaj grupit kriminal përfshijnë edhe prodhimin dhe mbajtjen e armëve pa leje. 10 nga personat e arrestuar janë me një mbiemër dhe me lidhje familjare mes tyre, ndërsa 4 të tjerë janë bashkëfshatarë të tyre.

Policia shpalli në kërkim edhe një tjetër person si bashkëpunëtor i tyre. Pjesa më e madhe e të arrestuarve banojnë në lagjet periferike pranë kryeqytetit, ndërsa kanë si vendlindje të përbashkët fshatin Lam i Madh në Dibër.

Organizatori i kësaj veprimtarie dyshohet se është ish kryetari i fshatit, Gëzim Koleci, i cili ka përfshirë dy djemtë e tij dhe shumë bashkëfshatarë të tjerë.

Në operacionin për kapjen e tyre morën pjesë një seri strukturash policore të Tiranës, Durrësit, Dibrës, Matit dhe Forcat e Ndërhyrjes së Shpejtë të kryeqytetit.

Javën e kaluar policia arrestoi 29 persona për kultivim dhe shpërndarje të bimëve narkotike.

Vlerësime kontradiktore jepen në Shqipëri lidhur me kultivimin dhe trafikimin e bimëve narkotike.

Burime të pavarura flasin për një rënie të kultivimit të cannabis sativa, ndërsa mbetet në nivele të konsiderueshme trafikimi i drogave të tjera, si pjesë e korridoreve të Ballkanit.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat