Kontrolle masive të territorit në Kurbin, arrestohen 2 persona për kultivim kanabisi

Shqipëria

Kontrolle masive të territorit në Kurbin, arrestohen 2 persona për kultivim kanabisi

Më: 5 maj 2022 Në ora: 12:06
foto ilustrim

Policia e Shtetit ka njoftuar sot përmbylljen e dy operacioneve policore në 24 orët e fundit me kontrolle masive të territorit për parandalimin e veprimtarisë kriminale të kultivimit, prodhimit dhe shitjes së narkotikëve në zonën e Kurbinit.

Sipas policisë, janë sekuestruar fidanë të dyshuar narkotikë kanabis sativa të kultivuar në kubikë dhe 320 bimë të dyshuara narkotike, të mbjella në tokë.

“Si rezultat i operacioni policor të koduar “Gjormi” është arrestuar në flagrancë shtetasi A. P., 51 vjeç, banues në fshatin Gjormë, Kurbin, pasi gjatë kontrollit të ushtruar në banesën e tij, shërbimet e Policisë kanë gjetur dhe sekuestruar, në cilësinë e provës materiale, fidanë të dyshuar narkotikë cannabis sativa, të kultivuar në kubikë”, ka shtuar policia.

“Si rezultat i operacionit policor të koduar “Fushë Malbardhë” është arrestuar shtetasi E.( I.). H. 51 vjeç, banues në fshatin Fushë Malbardhë, pasi gjatë kontrollit të ushtruar në oborrin e banesës së tij, janë gjetur dhe sekuestruar në cilësinë e provës materiale 320 bimë të dyshuara narkotike cannabis sativa, të mbjella në tokë”, njofton policia.

Materialet procedurale iu referuan Prokurorisë pranë Gjykatës së Rrethit Gjyqësor Kurbin, për veprime të mëtejshme, për veprën penale “Kultivim i bimëve narkotike”. 

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat