Theu masën e sigurisë “arrest në shtëpi” që i ishte caktuar nga Gjykata për veprën penale të prodhimit dhe shitjes së narkotikëve, rikthehet në qeli 35-vjeçari, që u kap përsëri duke shitur kokainë.
Policia e Elbasanit konfirmoi aksionin ditën e sotme (5 tetor) dhe njoftoi gjithashtu se gjatë kontrollit në banesë, të riut iu gjet dhe sekuestrua lëndë e dyshuar narkotike kokainë dhe peshore elektronike.
I arrestuari është A.K., kurse aksioni u krye nga Forca e Posaçme “Shqiponja”.
“Ky shtetas kishte dalë nga banesa e tij, në kundërshtim me vendimin e Gjykatës së Shkallës së Parë të Juridiksionit të Përgjithshëm Elbasan, e cila kishte caktuar masën e sigurisë “arrest në shtëpi”, për veprën penale “prodhimi dhe shitja e narkotikëve”. Në vijim të veprimeve procedurale, u ushtrua kontroll në banesën e shtetasit A. K., ku u gjet dhe u sekuestrua, në cilësinë e provës materiale, një sasi lënde e dyshuar narkotike kokainë dhe peshore elektronike”, bëri me dije policia vendore.
Pas procedurave paraprake dhe rikthimit në qeli, dosja i kaloi Prokurorisë Elbasan, për veprat penale “largimi i të burgosurit nga vendi i qëndrimit” dhe “prodhimi dhe shitja e narkotikëve”.
