Këtë të premte, Policia Kufitare ka ndaluar dy persona të shpallur në kërkim për vepra të ndryshme penale. Sipas njoftimeve nga policia, është ndaluar shtetasi G. S., 57 vjeç, ndaj të cilit GJKKO ka caktuar masën e sigurisë “Arrest në burg” për veprat penale “Kontrabanda nga punonjës që lidhen me veprimtari doganore” dhe “Grup i strukturuar kriminal”.
Është ndaluar gjithashtu shtetasi I. G., 38 vjeç, i cili ishte shpallur në kërkim nga policia e Durrësit për veprën penale “Vjedhje”.
“Shërbimet e Policisë Kufitare në Pikën e Kalimit Kufitar Qafë Thanë në dalje të RSH, në vijim të kontrolleve të shtuara për parandalimin dhe goditjen e paligjshmërisë, si dhe për kapjen e shtetasve në kërkim kombëtar dhe ndërkombëtar, ndaluan shtetasin në kërkim: G. S., 57 vjeç, banues në Cërrik, Elbasan.
Ndaj këtij shtetasi, GJKKO ka caktuar masën e sigurisë “Arrest në burg” për veprat penale “Kondrabanda nga punonjës që lidhen me veprimtari doganore” dhe “Grup i strukturuar kriminal”.
-Shërbimet e Policisë Kufitare në PKK Tushemisht, në hyrje të RSH, bënë ndalimin e shtetasit në kërkim: I. G., 38 vjeç, banues në Vlorë.
Gjatë verifikimit në sistem, ky shtetas rezultonte i shpallur në kërkim nga DVP Vlorë, për veprën penale “Vjedhja”. Veprimet e mëtejshme procedurale u kryen nga Komisariati i Policisë Vlorë, ku pas konsultimit me Prokurorin 38-vjeçari do të ndiqet në gjendje të lirë”, thuhet në njoftimin e policisë.
