Një automjet është përfshirë nga flakët dhe është djegur plotësisht në aksin e ri rrugor Qafë-Qarri–Ersekë.
Drejtuesi i mjetit ka arritur të dalë në kohë dhe fatmirësisht nuk ka pësuar lëndime.
Flakët janë përhapur edhe në anën tjetër të rrugës, duke përfshirë një sipërfaqe prej më shumë se 4 hektarësh me bimësi të ulët dhe kullota.
Në vendngjarje kanë ndërhyrë dy mjete zjarrfikëse të Bashkisë Kolonjë, të cilat kanë bërë të mundur izolimin e zjarrit dhe frenimin e përhapjes së tij.
Situata paraqiste rrezik të shtuar pasi në zonën e përfshirë nga flakët kalon edhe një linjë e tensionit të lartë.
