Komisioni i Reformës në Drejtësi, ka miratuar me konsensus ligjin për SPAK, Strukturën e Posaçme kundër Korrupsionit dhe Krimit të Organizuar.
SPAK është ligji i fundit i paketës prej 6 ligjesh që shoqërojnë reformën dhe priten të miratohen më 6 tetor në Kuvend.
Deputetët e opozitës u rikthyen në komision pas disa ditësh bojkot. Përfaqësuesi i PD-së, Oerd Bylykbashi, pas daljes nga mbledhja, e konsideroi sukses miratimin e saj pasi u pranuan të gjitha kërkesat e parashtruara nga opozita, që kundërshtonin kapjen e institucioneve të drejtësisë nga kryeministri dhe qeveria.
Nga 3 çështjet e kundërshtuara prej demokratëve dy javë me parë ishte lënë pa zgjidhur vetëm njëra prej tyre, ajo që lidhej me shqetësimin e opozitës për ndikimin e qeverisë në emërimin e gjyqtarëve, prokurorëve apo punonjësve të SPAK.
