Emisioni investigativ “Boom” në televizionin “Ora News” ka zbuluar skandalin e rradhës. Bëhet fjalë për shkeljen e procedurës së shortit, për caktimin e gjyqtarëve në Gjykatën Administrative të Shkallës së Parë, Tiranë. Në këtë çështje të regjistruar për gjykim duhet të ketë vetëm 1 gjyqtar, ndërkohë që shorti në këtë gjykatë zgjedh për të njejtën dosje, disa gjyqtar njëkohësisht.
Pas kësaj ai që përzgjedh një nga disa gjyqtarët e përcaktuar me short ,është kryetari i gjykatës, Eriol Roshi, i cili shkel në këtë mënyrë, jo vetëm procedurën ligjore, por dhe cënon hapur autonominë e gjyqësorit. Mbas zbulimit të këtij skandali, vihet në dyshim pavarësia e proçesit në zgjedhjet e gjyqtarëve në proçeset e mëparshme.
Gazetarët e “BOOM” kanë zbuluar se nje çështje regjistrohet disa herë brenda të njëjtës dite dhe pas hedhjes së shortit ndodh që e njëjta çështje i bie për gjykim disa gjyqtarëve. Në këtë moment ndërhyn Kryetari i Gjykatës që përcakton vetëm njërin prej tyre.
Raste të tilla në shortet e zhvilluara në gjashtë muajt e fundit pranë Gjykatës Administrative të Shkallës së Parë Tiranë, ka shumë. Një prej tyre është ai i marrë nga shorti i datës 2.2.2017 ku çështja e palëve, Dega e Doganës Lezhë dhe një Shoqërie Përmbarimore është regjistruar jo një, por tetë herë. Për pasojë nuk kemi një, por tetë gjyqtarë të përcaktuar për të ndjekur këtë gjykim. Dhe kryetari i Gjykatës Administrative ndërhyn dhe zgjedh njërin prej tyre.
Rasti i dytë vjen nga shorti i datës 16 janar 2017, ku për çështjen e regjistruar në 4 janar 2017 me palë të paditur Agjencinë Kombëtare të Burimeve natyrore janë zgjedhur 3 gjyqtarë.
Ky është rasti i tretë, në shortin e datës 30 janar 2017 e njëjta çështje është regjistruar përsëri 3 herë dhe për pasojë edhe këtë herë janë zgjedhur tre gjyqtarë nga të cilët vetëm një do të marrë në dorë gjykimin.
Ora Neës mësoi se në këto raste vetë gjyqtarët i drejtojnë një kërkesë Kryetarit të Gjykatës Eriol Roshi, i cili zgjedh më pas njërin prej tyre për të ndjekur çështjen. Problem i sistemit apo skemë e ngritur për të ndikuar që në nisje të një gjykimi në vendimin përfundimtar të tij? Kjo eshte nje pyetje qe lind rëndom në një rast të tillë, i cili nuk është i vetmi por përsëritet rregullisht në Gjykatën Administrative të Shkallës së Parë në Tiranë.
Pak ditë më parë emisioni “BOOM” publikoi një tjetër shkelje të rëndë të kreut të kësaj gjykate Eriol Roshi , i cili në kundërshtim me vendimin e Këshillit të Lartë të Drejtësisë shmangte ngarkesen e tij në gjykim. Vendimi parashikonte pjesëmarrje 50 % në ndarjen e çështjeve me short por për kryetarin Eriol Roshi nuk ndodh kështu.
