Shoqërohet një i dyshuar si vrasës i komisarit Artan Cuku më 8 prill në Tiranë. I shoqëruari, sipas burimeve të brendshme nga Policia e Shtetit, është një 24-vjeçar nga Kuçova me emrin Mikel Sh.
Shoqërimi i tij ka ndodhur në orët e para të mëngjesit pranë pallatit "me shigjeta". Ndërkohë mësohet se një operacion tjetër i drejtuar nga Hako Çako, Drejtori i Përgjithshëm i Policisë, ka nisur për kapjen e dy personave të tjerë të dyshuar si të lidhur me ngjarjen.
Hetuesit janë drejtuar tek Mikel Sh. nisur nga analiza e ADN-së që kanë përftuar nga bluza e hedhur në një kosh mbeturinash, gjetur menjëherë pas vrasjes së Cukut.
Ky person rezulton me precedentë të mëparshëm penalë.
Policia është treguar e vëmendshme për të mos lejuar rrjedhjen e informacionit lidhur me këtë ngjarje.
Komisari Artan Cuku u ekzekutua më datë 8 prill 2017, rreth orës 20:11, në rrugën e “Kosovarëve”, në hyrje të pallatit "Melros" ku banonte, me armë zjarri, pistoletë.