Drejtori i Përgjithshëm i Policisë së Shqipërisë, Haki Çako doli në një deklaratë për mediat ditën e sotme, duke bërë një bilanc të punës për mbarëvajtjen e procesit zgjedhor, por dhe të fushatës elektoralë.
“Në zbatim të urdhrit të ministrit të Brendshëm, lidhur me vëzhguesit e OSBE/ODHIR u sigurua mbarëvajtja e procesit. Nga strukturat e Policisë së Shtetit u përballua ngarkesa e punës, duke mbuluar mbi 2000 qendra votimi.
Gjatë të gjithë aktiviteteve nuk u evidentua asnjë aksident. U siguruan masat e lëvizjeve të figurave shtetërore, ndërsa nuk u konstatua asnjë incident. Janë trajtuar dhe po hetohen 44 vepra penale, nën procedim 84 persona, 7 të arrestuar. Më konkretisht 7 procedime penale ndaj subjekteve politike. Gjatë procesit të votimit në 25 qershor po trajtohen 25 procedime, që kanë cenuar zgjedhjet e lira”, tha Çako.
Drejtori i Përgjithshëm i Policisë së Shtetit foli edhe për situatën në Kavajë, ku po numërohen edhe votat për kryetarin e ri të bashkisë për të cilin u votuan po gjatë së dielës.
“Policia ka marrë të gjitha masat për mbarëvajtjen pa probleme deri në fund të këtij procesi edhe në Kavajë”, tha Çako.