Barcelona është goditur këtë pasdite nga një sulm terrorist dhe deri më tani bilanci i viktimave është 13 persona.
Ministri i Jashtëm Ditmir Bushati përmes një statusi në rrjetin social ka dënuar me ashpërsi sulmin si dhe ka shprehur ngushëllimet e tij për familjet e personave që humbën jetën.
“Dënoj fort sulmin terrorist në Barcelonë. Lutjet e mia shkojnë për viktimat dhe familjarët e tyre. Jemi me Spanjën në këtë moment të vështirë,” shkruan Bushati.
Një reagim ka patur dhe nga Ambasada Shqiptare në Spanjë e cila ka deklaruar se nuk ka viktima apo të lënduar me shtetësi shqiptare nga sulmi terrorist. Ambasada i ka bërë thirrje të gjithë shtetasve shqiptarë që jetojnë në Barcelonë që të qëndrojnë larg nga vendi i ngjarjes.
Sulmi terrorist ndodhi në sheshin Katalunja. Një furgon hyri në shesh dhe nisi të shtypte kalimtarët. Policia ka identifikuar një të dyshuar i cili ka marrë me qira furgonin që shtypi për vdekje 13 persona dhe plagosi disa të tjerë.
Emri i tij është Driss Oukabir, por ende në median spanjolle nuk ka një konfirmim nëse shtetasi me origjinë nga Maroku është ai që ka kryer sulmin.
