Dhjetë persona të dyshuar për atentatin ndaj të fortit të Selenicës u shoqëruan gjatë natës në komisariatin e Vlorës.
Akoma nuk ka të dhëna për autorët e krimit ku u plagosën dy burra dhe një fëmijë, por hetuesit vazhdojnë me dyshimet se ngjarja ka lidhje me masakrën e vitit 2015 në Çole dhe me atentatin e 27 majit të këtij viti, ku u ekzekutuan drejtori i OSHEE Roland Saliu, i cili ndodhej rastësisht me shënjestrën Mirvjen Hyseni, drejtori i një televizioni privat në Vlorë.
Shënjestra e atentatit me pseudonimin ‘Robi’, Ferdinand Llanaj sipas burimeve nga spitali ka marrë 10 plumba, në kokë dhe në trup.
Personi tjetër Dritan Begaj u qëllua me katër plumba, kurse fëmija tetëvjeçar u dëmtua fizikisht, por jo nga plumbat.
Ngjarja ndodhi paraditen e së dielës në rrugën Transballkanike, një zonë e populluar.
Një orë më vonë policia gjeti një BMW të shkrumbuar në rrugën Kafaraj, që lidhet me autostradën Levan- Tepelenë, poshtë një nënkalimi.
Nga kjo makinë dyshohet se u qëllua me breshëri automatiku në drejtim të Ferdinand Llanajt, që po udhëtonte me një Benz gri.
Ndërsa të martën, Policia e Vlorës e arrestoi Ferdinand Llanajn.
Nga hetimet ka rezultuar se pistoleta model 56 që u gjet pranë automjetit të tij “Mercedes-Benz”, që u sulmua me armë, i përket pikërisht Llanajt.
39-vjeçari iu kundërpërgjigj me zjarr atentatorëve, që janë ende të paidentifikuar.
Ferdinand Llanaj akuzohet për armëmbajtje pa leje.
Ndërkohë hetuesit kanë sekuestruar kamerat e sigurisë të bizneseve pranë kësaj zone, që mund të ndihmojnë në zbardhjen e fakteve dhe sqarimin e dokumentimin e plotë të ngjarjes.
Në vendngjarje u sekuestruan edhe një makinë tjetër “Renault Clio”, disa celularë dhe një shumë parash prej 1.6 milionë lekë.
Ndërsa në makinën BMW që u gjet e djegur në fshatin Kafaraj të Fierit, grupi hetimor gjeti dy kallashnikovë dhe 3 gëzhoja. Dyshohet se këto armë janë përdorur në atentatin ndaj Llanajt, ku mbetën të plagosur djali i tij 8-vjeçar B.Llanaj dhe Dritan Begaj 50 vjeç që ndodhej në makinë me të.
Armët do të ekzaminohen, ndërsa hetimet vazhdojnë për të identifikuar atentatorët.