Veliaj komenton rënien e Tiranës: Shlyem 450 mijë euro borxhe, gjyqtarët s’i korruptoj dot

Shqipëria

Veliaj komenton rënien e Tiranës: Shlyem 450 mijë euro borxhe, gjyqtarët s’i korruptoj dot

Më: 8 tetor 2017 Në ora: 14:54
Halili dhe Veliaj

Aksionet e Tiranës do të dalin në shitje. Dhe këtu flasim për pjesën që zotërohet nga Bashkia e kryeqytetit, që shkon në 34%. Këtë premtim e ka dhënë vetë kryebashkiaku. Erion Veliaj, i ftuar në emisionin “Kapital” në Vizion Plus, ka folur gjerësisht për situatën e klubit të futbollit, ndërsa konfirmoi se institucioni që ai drejton ka paguar 450 mijë euro borxhe.

“Çdo ndërmarrje e Bashkisë së Tiranës ku unë jam maxhorancë është sot me fitim: parkingjet, ujësjellës-kanalizimet, pra pothuajse të gjitha agjencitë tona janë me fitim. Ajo (i referohet KF Tiranës) është një ndërmarrje ku duhet të mbash ison e atij që hedh vallen, që është aksioneri kryesor dhe që ka vendimmarrjen absolute.

Pra, si të kem 1%, si të kem 49%, në sh.a., vendimmarrja absolute është e atij që ka shumicën. Kështu që do mbaj premtimin për shitjen. Momentalisht jemi duke bërë një vlerësim me kompani auditimi të klubit”, u shpreh fillimisht numri një i Bashkisë, ndërsa konfirmoi se një kompani është duke bërë auditimin financiar të klubit.

Pasi të bëhet vlerësimi, pritet që të ketë zhvillime sa i përket shoqërisë aksionere Tirana. Në maxhorancë është Refik Halili dhe kështu do të mbetet, derisa zotëron 66% të aksioneve.

BORXHET

I pyetur nëse ky institucion ndien deri diku përgjegjësi për rënien nga kategoria, Veliaj përgjigjet kështu: “Nuk kam unë asnjë kompleks. Në dallim nga paraardhësi që e futi në borxhe, unë i lava të gjitha borxhet. Tani më kanë ngel vetëm dy gjëra: o të korruptoj gjyqtarë, o të shkoj të loz vetë. Ne kemi paguar rreth 500 mijë euro… 450 mijë euro. Por mbi 500 milionë lekë, që kanë qenë borxhet e mbartura”. Kujtojmë që pas marrëveshjes që u nënshkrua në zyrat e Bashkisë, Erjon Veliaj i ndau në dy këste paratë që do t’i jepte për likuidimin e borxheve të mbartura nga e shkuara.

PËRGJEGJËSITË

Më tej ai zbulon edhe një bisedë që ka bërë me tifozët për rënien, ndërsa thekson se më shumë se shlyerja e detyrimeve, nuk mund të bënte. “Pra, jo vetëm që lamë vetëm borxhet e të tjerëve, por u thashë edhe tifozëve: vetëm të shkoj të loz vetë ose të korruptoj gjyqtarët. Asnjë nga të dyja s’di ta bëj: as të luaj vetë, as të korruptoj gjyqtarët. Luaj për qejf kalçeto, por jo të shkoj atje. Pra, çfarë kam pasur në dorë, e kam bërë”, shpjegoi numri një i këtij institucioni.

PRIVATIZIMI

Kryebashkiaku sqaron se të gjitha asetet që Bashkia Tiranë ka në zotërim do të shfrytëzohen dhe kështu po veprohet edhe me stadiumin “Selman Stërmasi”, pasi kjo është forma e vetme për të pasur përfitimet. “Aksionet do t’i nxjerr në treg, por duhet të kuptoni edhe diçka tjetër, në Tiranë paguajnë taksë edhe ata të Partizanit, edhe të Dinamos, edhe të Farkës, edhe të Studentit, edhe të Dajtit. Jo po unë jam gati ta diskutoj dhe atë.

Se të kesh asete ekonomike dhe ta përdorësh një herë në dy javë kjo është për të ardhur keq. Kur ty të është dhënë një copë imobiliare në qendër të Tiranës dhe asete kudo e s’po i shfrytëzon, atëherë merru paratë. Mund të jetë një klub tjetër, mund të jenë Dëshmitarët e Jehovait, mund të jetë një parti politike, mund të jenë ata që bëjnë joga.

Por komercializoje sepse bashkia të ka dhënë një aset nga i cili mund të vjelësh para e të financosh klubin. Ju kujtohet si ishte parkingu përpara stadiumit ‘Dinamo’? Kishte njerëz që rrinin kot dhe shisnin makina të përdorura. Pra, edhe atë aset ia kishin marrë”, përfundoi Veliaj.

Sot mund të lexoni Shfletoni kopertinat