Kryetari i Bashkisë së Himarës, Jorgo Goro, i cilëson tërë- sisht politike reagimet për shembjen e objekteve që preken nga plani urbanistik i qytetit. 6 Goro thotë se projekti është miratuar në unanimitet nga Këshilli i Bashkisë së Himarës, nga të majtët dhe të djathtë, përfshirë edhe PBDNJ.
Duke e cilësuar projektin si strategjik për rritjen e turistëve, kryebashkiaku thotë se edhe vetë Athina zyrtare, pasi është njohur me këtë projekt, ka ulur tonet.
Si i konsideroni reagimet lidhur me projektin urbanistik?
Kemi të bëjmë me një projekt, i cili do t’u shërbejë të gjithë banorëve të Himarës, ashtu si edhe ndodhi këtë vit. Vetë banorët e panë mjaft mirë rritjen e nivelit të turizmit dhe pa dyshim ky projekt do t’u shërbejë të gjithëve, për të vijuar e rritur cilësinë dhe nivelin e turizmit në Himarë. Më e qartë situata ishte këtë verë në Himarë, gjatë këtij sezoni turistik.
E konsideroni çështjen të ndikuar politikisht?
Gjithçka është shfrytëzuar politikisht, sa i përket projektit të rikualifikimit urban në Himarë. Edhe deklaratat e bëra së fundmi janë ndikuar nga politika. Dua të them se projekti është miratuar unanimisht nga këshilltarët, duke përfshirë këtu edhe këshilltarët e PD-së, por edhe këshilltarët e PBDNJ-së në Këshillin e Bashkisë së Himarës.
Banorët pretendojnë se nuk po u jepet dokumentacioni i legalizimit…
Jo më larg se dita e enjte, që ishte edhe afati i fundit, banorët e Himarës kanë zhvilluar një tjetër fazë konsultimi me bashkinë, ku kanë parashtruar kërkesat e tyre për shpronësim edhe të truallit, dhe jo të gjithë janë të pajisur me dokumente pronësie. Natyrisht që bashkia do të ndjekë me vëmendje gjithçka dhe do t’u japë zgjidhjen e duhur banorëve të Himarës.
Reagim për çështjen e Himarës ka pasur dhe nga Greqia…
Edhe Athina zyrtare, pasi është njohur me projektin në fjalë e në detaje dhe si do të zbatohet ky projekt, i ka ulur tonet e saj dhe duket se gjithçka po shkon drejt realizimit të projektit.
Sa objekte janë shembur deri tani?
Janë tetë objekte, të cilat janë shpronësuar, e u krye dhe ndërhyrja e IKMT-së në aksionin e saj në ditën e parë të zhvilluar në Himarë. Pra, ishte totalisht e ligjshme ndë- rhyrja që kreu IKMT në Himarë për objekte që janë shpronësuar sipas ligjeve dhe dokumentacionit të vetë pronarëve.
Do të ketë ndërhyrje të tjera nga IKMT?
Sa i përket vijimit të projektit dhe shembjes së objekteve të parashikuara, pritet vendimi i Gjykatës Administrative, pasi 12 objekte janë në proces gjyqësor, pas masës së sigurisë të dhënë ndaj këtyre objekteve, të cilin e cilësojmë të paligjshëm.
E keni apeluar vendimin e Gjykatës?
Patjetër, sapo jemi njohur me vendimin në fjalë, ne kemi vepruar duke apeluar këtë vendim të Gjykatës që nuk ka asnjë sens.
