Ambasada e Shteteve të Bashkuara të Amerikës reagoi në lidhje me çështjen e Prokurorit të Përgjithshëm.
Në kohën kur Komisioni i Ligjeve ishte përfshirë në debate të forta në lidhje me mënyrën se si duhet vepruar, ambasada publikoi një deklaratë ku thuhet se mbështesin opinionin e OPDAT dhe EURALIUS.
“Kushtetuta dhe ligji për Prokurorinë janë të qarta. Ambasada e Shteteve të Bashkuara mbështet opinionin ligjor që OPDAT dhe EURALIUS i kanë dhënë Parlamentit. Ne nxisim Parlamentin të zbatojë ligjin,” thuhet në deklaratë.
Misionet e huaja përkrahin zgjedhjen e një Kryeprokurori të përkohshëm.
OPDAT shprehet se “mandati i kryeprokurorit përfundon në fillim të dhjetorit dhe përgjegjës për emërimin e kryeprokurorit të ri është KLP, një organ që ende nuk është krijuar”.
“Në këto kushte, ekziston një dispozitë: propozohet të emërohet një kryeprokuror i përkohshëm derisa të ngrihet KLP”.
Prokurori i përkohshëm mund të zgjidhet me shumicë të thjeshtë të votave.
Sipas OPDAT, asnjë institucion nuk ia zgjat mandatin kryeprokurorit.
