Rruga Qafë Thore – Theth, 16 km që lidh një ndër zonat më të bukura të Alpeve me Bogën dhe Shkodrën, parashikohet të fillojë në pranverën e vitit të ardhshëm.
Lajmin e ka bërë të ditur zv/kryeministrja Senida mesi e cila ka postuar në facebook disa foto nga projekti i kësaj rruge.
“Investimi do të zbatohet nga Fondi Shqiptar i Zhvillimit në kuadër të projektit “Rrugët Lidhëse Rajonale dhe Lokale” për llogari të qeverisë shqiptare dhe Bankës Botërore”, thekson Mesi, transmeton atsh.
“Projekti për këtë rrugë është pjesë e investimeve që rrjedhin nga Plani Sektorial i Turizmit për Rajonin e Alpeve Shqiptare, që bashkë me strategjinë e marketingut turistik dhe programin e investimeve për infrastrukturën vendore përbëjnë atë që njihet si Masterplani i Alpeve”, vijon Mesi.
Ndër të tjera, shton zv/kryeminstrja Mesi, “projekti parashikon gjerësi asfalti 4 – 4,75 metra dhe në 3 pikat më të rrezikshme të rrugës do të ndërtohen 3 tunele nga 20 -30 metra për të siguruar mbrojtje nga ortekët. Përveç lehtësimit të qarkullimit edhe gjatë stinës së dimrit kur fshati bllokohet nga dëbora, rruga do të ofrojë siguri më të lartë”.
