Kryetari i PD, Lulzim Basha, në bashkëbisedimin që ka nisur me gazetarët ka nxjerrë në pah dy skandalet më kryesore të kësaj vere të një qeverie që bashkëqeveris me krimin: i pari ishte lidhja e deputeti Taulant Balla me anëtarin e bandës së Lushnjes, Edmond Begon dhe lidhja e deputetit Jurgis Çyrbja me anëtarin e bandës së Shullazit, Gilmando Danin.
“Dje bandat kanë ndërmarrë një akt të paprecedentë ndaj koleges suaj Klodiana Lala, - tha Basha. - I turpshëm dhe i neveritshëm është reagimi i Prokurorisë, që në vend të deklaratave inkurajuese, duhet të fillojë hetimin gjithpërfshirës se nuk ka njeri në Ballkan e Europë që nuk e kupton se kjo ndodh kur qeveria bashkëqeveris me krimin.
Pas këtij akti kriminal qëndron bashkëqeverija e Ramës me krimin. Denoncimi i fundit i kësaj gazetareje ishte lidhja e Çurbjes me bandat. Në Kuvend duhet të kishte mbërritur kërkesa për arrestimin e Çyrbjes. Mos kujtoni se bandat kriminale e kanë anëtarësimin me tesara apo bordero, por është me bashkëpunim. Asnjë kërkesë nuk ka mbërritur për arrestim. Krimi e kupton syshkeljen nga pushteti. Krimi nuk pret ta marrë në telefon Edi Rama, por mjafton edhe një syshkelje si në rastin e gazetares kur plumbat të binin dhe në dhomën e dy fëmijëve.
Në Shkodër, bandat si ajo e Bajrave, rrëmben e përdhunon dhe shoqërohet me furgon Policie. Më vjen keq që një pjesë e mediave e kanë censuruar. Por kur kryeministrin e kanë në xhep, ato sundojnë.
Bandat sundojnë Elbasanin ku sot kanë Policinë dhe me gjithë premtimet e mëdha, asnjë nga bandat nuk ka përfunduar prapa hekurave se e kanë për krenari lidhjen me pushtetin.
E dëgjuar Taulantin? “E kam mik”, tha. Është mik me anëtarin e bandës së Lushnjes dhe kjo miqësi me të ka bërë që të shkelet ligji për prokurimet dhe Edmond Bego të përfitojë 14 milionë euro në zonën elektorale të Taulant Ballës!”