Pas ankesës në platformën e bashkëqeverisjes shqiperiaqeduam.al, një qytetar nga Pogradeci arriti të merrte brenda 7 ditësh lejen e legalizimit, për të cilën kishte 10 vite që kishte aplikuar.
Ky ishte rasti i radhës i prezantuar sot në Korçë, mbi suksesin e platformës së bashkëqeverisjes për zgjidhjen e problemeve të qytetarëve.
Kryeministri Edi Rama nënvizoi afatin 10-ditor për t’i dhënë përgjigje çdo kërkese, dhe në rastin kur qytetarit i takon, ai merr zgjidhje brenda 10 ditësh.
Konkretisht, Krenari nga Pogradeci, kishte 10 vjet që kërkonte të bënte legalizimin e banesës dhe e mori atë për 7 ditë, pas ankesës në platformë.
“Kishte vite që kisha aplikuar për legalizimin për të më dalë leja e shtëpisë, ishte e pamundur. Vija në Pogradec dhe më thoshin duhet të shkoja në Korçë, vija në Korçë dhe më përcillnin në Pogradec. Falë platformës suaj për 7 ditë më doli leja e legalizimit”, tha qytetari. /ATSH
