Ministri i Brendshëm, Fatmir Xhafaj përmes një statusi në rrjetin social “Twitter” ka reaguar ndaj akuzave të kreut të PD, Lulzim Basha, për shtim të krimit të vend ku sipas tij.
Në postimin e tij, Xhafaj ka hedhur poshtë akuzat e Bashës se shqiptarët sundohen nga bandat, të cilat kontrollojnë fizikisht territorin, ekonominë dhe pushtetin.
Sipas ministrit të Brendëshëm deklarata e një dite më parë e kreut të opozitës ka qenë gënjeshtra e radhës.
“Basha, dje: “Shqiptarët sundohen nga bandat, të cilat kontrollojnë fizikisht lagjet, qendrën, lokalet luksoze, territorin, ekonominë, ato pikat e bixhozit, ekonominë, hotelerinë, restorante, turizëm, kontrollojnë pushtetin, të gjithë pushtetin”. Kjo ishte GËNJESHTRA e radhës!”, shkruan ai.
Ministri e ka shoqëruar statusin e tij edhe me dy tabela ku tregon rënien e nivelit të vjedhjeve me armë dhe dhunë, duke krahasuar 2018-ën me 2010-ën, kohë në të cilën Basha mbante postin e ministrit të Brendshëm.
“Deklaratë pa sens e minimum logjike. Ky takëm politikanësh fatkeqësisht e kanë mbështetur të ardhmen mbi akuza të pavërteta e shpifje bajate! Traumat e të kaluarës në perceptimin e pranimin e të vërtetave, po kushtëzojnë kreun e opozitës. E VËRTETA në shifra! Imazhe sa 1000 fjalë!”, shkruan Xhafaj në “Twitter”