Raporti i Kontrollit të Lartë të Shtetit me kritikat ndaj financave të qeverisë është bërë objekt debatesh të forta në komisionet kuvendore.
KLSH ka dalë në konkluzionin se qeveria ka fshehur shifrat e borxhit. Përgjigjet ministri i Financave, Ahmetaj thotë se deficiti është brenda ligjit. Borxhi publik është ulur.
Kontrolli i Lartë i Shtetit paraqiti para Komisionit ekonomik raportin kritik për buxhetin e vitit 2017. Por ndryshe nga vitet e shkuara, këtë herë para deputetëve nuk ishte Bujar Leskaj, i cili e argumentoi mungesën me përfundimin e mandatit të tij në krye të KLSH-së.
“Në disa zëra buxhetorë, përfshirë deficitit dhe borxhit publik janë bërë devijime në drejtim të hartimit, zbatimit, monitorimit dhe raportimit”, u shpreh Manjola Naço, drejtoreshe e KLSH.
Por Ministri i Financave i ka hedhur poshtë përfundimet e KLSH-së se qeveria ka shtrembëruar shifrat e deficitit. Arben Ahmetaj tha se diferencat e pretenduara janë të stisura.
“Sisistemi informatik qeveritar i bërë si i tillë për të ndihmuar thesarin ka qenë edhe në vitin 2011. Që ka qenë edhe i njëjti”, u shpreh Arben Ahmetaj.
Sipas KLSH shtrembërimi kryesor i deficitit vjen nga krijimi i detyrimeve të prapambetura, veçanërisht për rimbursimin e TVSH-së.
Por Ministria e Financave thotë se ato që KLSH klasifikon si borxh i prapambetur janë riskeduluar në marrëveshje me vetë kompanitë. Arben Ahmetaj tha se financat e shtetit janë forcuar nga viti në vit dhe këtë e certifikoi dhe tregu ndërkombëtar.
“Ne skanohemi çdo muaj. Arritëm të emetonim një bono europiane, me një çmim 3,5 %. Që është një sukses i ekonomisë” tha Ahmetaj.
