Pas deklaratës mesditën e sotme nga këshilltari Ligjor në PD, Gazment Bardhi, se emërimi i drejtorit të ri të burgjeve është në shkelje me ligjin, ka ardhur edhe reagimi i ministres së Drejtësisë, Etilda Gjonaj.
Në një deklaratë për mediat, ministrja thotë se “Bardhul Kaçori u zgjodh për eksperiencën e tij shumë vjeçare të spikatur në Policinë e Shtetit, për gradat dhe për angazhimin e tij në poste të larta drejtuese, me rezultate konkrete dhe jo për aktivitetin e tij privat apo qytetar në periudhën kur nuk ka qenë i angazhuar në asnjë detyrë shtetërore”.
Gjonaj shpreh keqardhje për deklaratën e përfaqësuesit të PD-së z.Bardhi, që tregon se ka zbuluar se drejtori i ri i Policisë së Burgjeve është angazhuar si komisioner i PS në zgjedhjet e vitit 2013. “Çfarë mund të themi ne që gjatë kësaj periudhe kemi identifikuar afro 200 punonjës me rekorde kriminale në sistemin e burgjeve, që juve s’ju kishin rënë fare në sy! Dhe më shumë se 100 të tjerë të punësuar në sistemin e burgjeve jashtë kritereve ligjore!”, thotë Gjonaj.
Më tej në deklaratë, ministrja thekson se “si bartës i detyrës shtetërore ai s’mund të angazhohet në aktivitete të natyrës politike, për sa kohë do të mbajë këtë detyrë. Por kjo dihet, s’ishte nevoja për një reagim publik, pa lidhje”!