Kolegji i Posaçëm i Apelimit ka programuar këtë të hënë zhvillimin e seancës dëgjimore për gjyqtarin e Gjykatës së Lartë, Edmond Islamaj, i cili është edhe vet i pranishëm.
Islamaj u konfirmua në detyrë nga shkalla e parë e vettingut, Komisioni i Pavarur i Kualifikimit, por Komisioneri Publik kërkoi ndryshimin e vendimit ndaj tij.
Sipas komisionerit publik, te kriteri i pasurisë ka mospërputhje në hetimin administrativ që kreu KPK-ja, të cilin e ka quajtur hetim të paplotë.
Mangësitë e hetimit administrativ të kryer nga KPK-ja, Komisioneri Publik ka kërkuar që të riparohen në shkallën e dytë të vettingut.
Në kërkesën e apelimit përmenden mes të tjerash blerja e një trualli në Karpen, për të cilin ka dyshime se nuk është llogaritur siç duhet çmimi i referencës.
