Trajneri i Paris Saint-Germainit, Thomas Tuchel, e ka konsideruar të ligë vendimin për ta akorduar një penallti për Manchester Unitedin, në fund të ndeshjes së mbrëmshme, mirëpo insistoi se është tifoz i madh i VAR-it.
Gjyqtari i ndeshjes e akordoi një penallti në minutat shtesë të ndeshjes, pasi një goditje e Diogo Dalotit u ndal nga krahu i Presnel Kimpembe. Ky incident u shqyrtua edhe nga VAR-i.
Marcus Rashfordi përfitoi nga kjo mundësi e artë dhe e shënoi golin që e kualifikoi Manchester Unitedin në çerekfinale të Ligës së Kampionëve, me fitore 3:1, për shkak të epërsisë së golave të shënuar si mysafirë.
“Ishte një vendim i madh, një vendin i ligë... por, është e vështirë. Ka arsye për ta dhënë atë penallti, mirëpo kur vjen puna te prekjet me dorë, faktet gjithmonë janë të buta”, ka thënë Tuchel, në konferencën për shtyp pas ndeshjes.
“Goditja e tij [Dalotit] nuk ishte ndonjë mundësi shumë e madhe për të shënuar gol. Topi po shkonte jashtë portës dhe papritmas referohet një penallti”.
“Por, unë jam ende një tifoz i madh i VAR-it. Kur vjen puna te prekjet me dorë, kjo është një gjë shumë e rëndësishme sepse ka shumë arsye pse mund ta akordosh penalltinë dhe pse mund të mos e akordosh... distanca, pozita natyrale, ka shumë gjëra për t’u diskutuar”.
“Mendoj se ishte një vendim 50-50. Ky është problemi ynë. Njerëzit që i përdorin këto argumente, thonë se nuk duhej të ishte referuar penalltia. Për një goditje që po shkonte 50 metra mbi shtyllë, ta marrësh një penallti... Nuk është logjike”.
